منتديات داماس


Moved to new forum, Click Here to register





الحلقة الرابعة


مدير عام المنتدى للمشرفين :
أنا كنت عايز أناقش معاكم فكرة كده



المشرف
:
خير اللهم اجعله خير



المدير العام :
هى قواعد الكتابة فى المنتدى حاليا كام
صفحة



المراقب :
حوالى 25 صفحة تحتوى على 3000 بند


المدير العام
:
لااااااااا دى كده تبقى بسيطة ..
أنا عايزكم تخلوها 100 صفحة ..
فيها على الاقل
50000 بند ..
ولو عرفتم تخلوها أكتر من كده يبقى
أحسن ..



المشرف :
مش كتير كده يا بوس ...
ده اللى مسجل
جديد على ما يقراها تكون سنانه وقعت ..



المدير العام
:
ماهوه ده المطلوب ياعم .. مش عايزين حد يقراها ..
وصلت الفكرة
يا زغللة ..!!



حلموس :
فكرة بمليون جنيه .. الكبيركبير يا بوس


احمد نينجا :
ما تفهمونا إيه العبارة يا خوانا ..


حلموس :
يعنى اللى هيسجل جديد لازم يوقع
إنه قرا قواعد الكتابة
فى المنتدى ووافق عليها .. تمام ..



فتكات :
طبعا لما يلاقى 100 صفحة تحتوى على خمسين ألف بند
هيروح موقع من غير ما يقرا
حاجة .. تمام ..





حزلقون :
لأ مش تمام .. مش فاهم حاجة ..!!


المشرف :
هو انت ديما كده مش فاهم حاجة ..
أى حد يكتب حاجة ما تعجبناش نروح لازقينه إنذار ..
ونقول له إجرى يلا روح إقرا قواعد المنتدى قبل ما تكتب ..
داهية فيك وفى أيامك السودة ..



حزلقون :
طب إفرض عضو غتيت
ورخم قرا القواعد كلها
قبل ما يوقع ..


المشرف :
من لم يمت بالسيف مات بغيره .. مين يعادينا .. هيه هيه ..




المدير العام
بيقول للمراقب :
نبه على جميع المشرفين إن فيه إجتماع هام
الساعة 3 فى قسم المشرفين .. الإجتماع مغلق وسرى للغاية ..


المشرف :
بخصوص إيه


حزلقون :
أنا عن نفسى معرفش يظهر إنه توب سيكرت ..
المدير العام حويط اوى ..
مش عايز حد من الأعضاء يشم خبر عن الإجتماع ..




وفى منتدى المشرفين الساعه 3 بدأ اجتماع مغلق
وسرى للغاية بحضور جميع المشرفين ..


المدير العام :
طبعا مستغربين أنا جمعتكم ليه النهارده ...
الموضوع باختصار إن فيه معلومات وصلت للقيادة السياسية
إن المنتدى فيه عدد كبير من الأعضاء بيسبحوا ضد التيار
وما بيعرفوش يعوموا .. وهيغرقوا ويغرقوا المنتدى معاهم ..
ووصلتنى معلومات مؤكدة
إنهم ندبوا لجنة حموم الانسان علشان تقوم بزيارة مباغتة
جدا للمنتدى ومعرفة مدى صحة المعلومات دى..
لازم نلملم نفسنا بسرعة ونستعد للزيارة المباغتة دى
واللى غالبا حتكون الأسبوع اللى جاى يوم السبت ..


احمد نينجا :
إحنا جاهزين يا بوس ... لازم نبتدى نلملم كل المواضيع
اللى رافعة الشراع ونغرقها ..




المشرف :
تمام ونخلى المواضيع اللى عايمة ع الوش ..


حلموس :
مفيش مواضيع كويسة غير الموضوع بتاع جرجاوى
( المية تروى العطشان .. )


المدير العام :
مين جرجاوى ده ؟


المشرف :
ده بيبيع جرجير .. فى اول المنتدى .. وغاوى رش مية ..

حزلقون :
عايزين نستعد للموضوع ده بكل جدية يا جماعة..
زيارة لجنة حموم الانسان للمنتدى شئ مش بسيط ..

المدير العام :
ندخل على النقطة اللى بعدها فى جدول الأعمال ..
تنظيم موكب رئيس اللجنة


المشرف :
أنا رأيى إن الموكب يدخل من باب المنتدى العام
ولو زحمة يبقى من باب الأسرة والطفل ..


فتكات :
مش هنرش المنتدى يا بوس


المدير العام :
إيه المناسبة ..


فتكات :
علشان نطرى القاعدة ..


المدير العام :
إنتى مين يا بنتى ...إنتى بقالك كتير معانا هنا


حلموس :
فعلا .. أول ما تخش اللجنة ندلق عليهم جردل ميه ..


المدير العام بيتكلم مع المراقب :
أول لما الزيارة دى تتم على خير الطقم ده كله لازم يتغير!!


المراقب:
ويا ترى هنقدرنعوض العباقرة دول تاني يا بوس




وانتهى الاجتماع على خير..





وحلقة اخرى ..




الحلقة الخامسة



المدير العام بيقول للمراقب :
متنساش تجيب الديجيتال كاميرا العهدة بتاعة المنتدى
اللى بنصور بيها الأعضاء الجداد وش وقفا وهما بيسجلوا
عندنا هنا أول مرة يوم الزيارة علشان تاخدولى كام صورة
مع لجنة حموم الانسان دى ..


المراقب :
أمرك يا بوس .. ونتكلم دلوقتى عن التنظيم ..
انا بقترح إننا كلنا نلبس بدل اسموكن سودا وبابيون أحمر ..



المشرف :
بس شكلنا كده حنبقى زى السفرجية يا كنج ..
أنا بقول يعنى بلاش نلتزم كلنا بنفس اللبس ..
يعنى اللى عايز ييجى ببدلة ييجى .. اللى عايز ييجى بجينز
وتى شيرت ييجى .. وكده يعنى !!


حلموس :
فكرة حلوة يا موشى التى شيرت دى .. إحنا نلبس كلنا
تى شيرت واحد عليه صورة المدير العام كرمز للمنتدى
وبنطلونات شورت زى بتاعة الكشافة وجزم اديدز..
وشرابات طويلة لغاية الركبة ..


احمد نينجا :
ياعم شورتات إيه بس وشرابات طويلة ..
أهم حاجة نلبس كلنا نضارات سودا ونحط سماعات فى ودانا ونقعد نتلفت حوالينا وورانا ونبص لبعض كل شوية
نظرات قبيحة ومريبة فى نفس الوقت..
ولازم نبقى على إتصال مع بعض باللاسلكى أثناء الزيارة ..
مهم جدا اللاسلكى ده علشان ننبه بعض لو عضو من إياهم
حاول التسلل أثناء الزيارة .


حزلقون :
لازم نحبس الأعضاء أثناء الزيارة اللى إحنا متأكدين
من عدم ولائهم لينا... بس المشكلة إننا لو عملنا كده
مش حيتبقى غير تلاته أربعة ومش حنعرف نجيب أعضاء
نوقفهم قدام أبواب المنتدى علشان يهتفوا ويرحبوا باللجنة ..

احمد نينجا :
مش مشكلة .. نجيب كومبرس على إنهم الأعضاء..
كمان هيلزمنا حتتين سلاح.. لازم أوصل البلد عندنا أشترى
كام فردة واجيب أنفار ..



فتكات :
واجب برضه نشترى شوية بالونات وبمب والعاب هوا ..
نسينا كمان نعمل قسم جديد فى المنتدى نسميه ( الاستحماية ) علشان اللجنة تفتتحه .. ولازم كمان نحط شريط سوليفان
على كل باب من أبواب المنتدى علشان اعضاء اللجنة
يقصوهم .. لازم ياجماعة كل واحد يقص له شريط على الأقل.. ولوإتبقت شرايط بعد كده أقصهم أنا ..


تعالت أصوات المشرفين إحتجاجا على رغبة فتكات
بأن تقص ما تبقى من شرائط ..


حلموس :
وليه مقصهمش أنا


المشرف :
محدش حيقص غيرى ..


حلموس :
طب يمين على يمينك محد هيقص إلا أنا ..
ثم تنتابه نوبة من البكاء الشديد ..
وتدور الدنيا به وتظهر أمام عينيه دوامات كأنه يتذكر
أيام الطفولة والماضى المنيل بنيله ..
ويتمدد حلموس على الأرض ويتجمع المشرفين من حوله..


يقوم المراقب بعمل تدليك سريع للقلب لحد مافاق
وبدأ يروى لهم قصته مع الإشراف



حلموس :
زمان وانا عمرى 7 سنين كنت بروح مع أبويا الدكان
كل يوم جمعة بعد الصلاة .. كان عندنا محل أقمشة فى الدرب
الأحمر .. كانت متعتى إنى أشوف العامل اللى فى المحل وهوه
بيقص القماش للزباين.. كان عنده مقص كبير قوى طوله يجى
نص متر .. مره سهيته وخدت المقص وخبيته فى جيب القميص
بتاعى لكن أبويا شافه ونزل فيا ضرب بالإقلام والشلاليت وإنضم
له كل العمال فى الدكان.. لحد ما سخسخت..
ومن ساعتها وأنا أى حاجة بشوفها ببقى عايز أقص منها.!!


حزلقون :
أمال لو حكيتلكم حكايتى حتقول إيه



المدير العام طيب ..
ندخل فى البند اللى بعده والخاص بالمأكولات
التي ينبغي ان نوفرها لاعضاء اللجنة
ممكن أسمع أرائكم؟


احمد نينجا :
بـــس أنا جتلي فكرة جهنمية ، منها نعمل حاجة تشرفنا قدام الناس دي ومنها نوفر


المدير العام :
قول يا ابو النصاحة إحنا سامعين


احمد نينجا :
أنا انزل السوق أشترى كرومباية على 2 ك بتنجان أبيض
وحزمة ملوخية خضرا و 4 ك لحمة ضاني ونخلى المشرفات
يعملوا حلتين محشي و ملوخية وناكل كلنا ونهيص ..


المراقب:
ممكن يا اخ نينجاوى تطلع بره شويه وهانندهلك لما نخلص


احمد نينجا :
حاضر .. بس ليه يا كنج ؟





المدير العام :
يا اخ نينجا بنقولك حاجة تشرفنا .. تقولنا محشي ،
يا اخي عيب كده .. ده كان إستهلال لابد منه ..
هـــــا يا سادة انا عايز مشاركين لا متفرجين


حزلقون :
بس وجدتها .. إحنا نعمل علب وجبات وكل وجبة فيها
سندوتش جبنة رومي وحتت جاتوة ..


فتكات :
إيه نظام الأفراح البلدي ده ؟ عايزين أفكار محترمة يا أخوانا


حلموس :
ممكن أقول رأيي ؟


المدير العام :
أيوه وماله من حقك


حلموس :
زي مانتوا عارفين أنا عندي مزرعة في الكيلو 923
وانا مربي هناك كام دكر بط على فرختين عتاقي ،
فأنا بأقترح إننا ندبح البط ده جنب الفراخ
مع شوية برتقان بصرة من بتوع المزرعة ونمشي الليلة


حزلقون :
والله شكلكوا هاتكسفونا مع المحشي والبط والكلام ده
واللجنة هاتيجي تغلق المنتدى بسببكم ،
يا جماعة الناس اللي جايه فيهم ناس كبيرة في السن يعني
بالتأكيد عندهم السكر والضغط والكوليسترول والكلام ده .. عايزين حاجات خفيفة وصحية وعلى رأي المثل
" صحي ومفيد "
( قال يعنى ده مثل )


المراقب :
شكرا يا سادة .. بعد ما أستمعنا إلى جميع الآراء
بشكل ديمقراطي ديماجوجي ..
احب أقوللكم إن انا والمدير .. إتفقنا من الاول إننا نتصل
بمطعم مكسيم عشان يبعت لنا وجبات جاهزة
وتبقى حاجة محترمة قدام اللجنة ..


فتكات:
يحيا العدل هي دي الديمقراطية .. الله ينور عليك بس
عدم اللامؤخذه إنتوا كنتوا جايبنا ليه وسمعتوا أرائنا ليه ؟


المراقب :
ممكن تسكتى؟


المدير العام :
ننتقل للبند اللي بعده ... المشروبات ...
ولو سمحتوا اللي هاشاور عليه هو بس اللي يتكلم
مش عايزين فضايح ..
أيوه أتفضل يا اخ حلموس


حلموس :
ربنا يخليك لنا يا بوص ده أحنا من غيرك ولا حاجة
وناقصنا كام مليون حاجة


المشرف :
هايشتغل بقى في الاغاني الحمضانة بتاعت شادية
ومصر اليوم في عيد وهاينكش لنا القصة بتاعته ..
الشغل ده أنا عارفه


المدير العام :
مش اناقولت ماحدش يتكلم إلا اللي أشاور عليه ..
عمومآ خلاص خلاص..
انا قررت انا و المراقب أساسا إننا نقدملهم يانسون




فتكات :
برافو عليك .. أنا بحب جدا الحاجات النيتشورال اللي زي دي

واهى منها مهدئات .. ربنا يهدهم يارب





المدير العام بيقول للمراقب :
مهدئات !! هى البت دى بتشتغل فى صيدلية
بعد المنتدى واحنا ما نعرفش !!

عمومآ .. اقفل عليهم المنتدى لما الليلة دى تعدى على خير ..





واتقفل الاجتماع على خير..





وحلقة اخرى ..


هههههههههههههههههههههههه
أضحكتنى كثيراً من القلب
بارك الله فيك
ومنتظرين بقية الحلقات


لا يا عم هذا المسلسل لازم نوقف عرضو حالا
أنا شخصيا رح أرفع طلب لوزارة الإعلام والإذاعة والتلفزيون 00000000 حتى يوقفو عرض هذا المسلسل
إحنا تهزءنا يا اخوانا
ههههههههههههههه


مساكين الاخوة في الادارة والاشراف ونحن لا نرحم احد

ههههههههههههههه


شـكــ وبارك الله فيكم ـــرا لكم ..
لكم مني أجمل تحية .

تشرفت بمروركم ..




الحلقة السادسة




المدير العام :
النهاردة يا جماعة معانا فى الاجتماع
المشرف الجديد بالوظة ..
وانا شايف ان ليه اراء معكوسة ومتجهات مقلوبة
ممكن تفيدنا فى اجتماعتنا ..


المشرفين بيتغامزو ويتهامزوا :
هو احنا موش ماليين عينه ولا ايه !!


المدير العام :
ودلوقتى نخش فى الاجتماع ..
ياجماعة وانا بتمشى بالليل فى المنتدى لوحدى ..
وبعد ما عصرت افكاركم كلها ..
لقيت ان
الفاضلة
فتكات أثارت نقطة مهمة وهى
نعمل قسم جديد فى المنتدى نسميه ( الاستحماية ) ..
إزاى ما عندناش القسم ده
فى
المنتدى طول السنين اللى فاتت دى ..
إنتم عارفين إن اللجنة أول ما هتوصل
هتسأل
على أى حاجة علشان تفتتحها .. لازم نعمل القسم ده بسرعة
فى المنتدى ويكون
ملحق بيه مناشف وبوفيه ..
واستراحة ودورة مية ..



المراقب :
المكان موجود يا بوس ..
فيه مساحة فاضية فى المنتدى الادبى كنا عاملينها خرابة
بنحبس فيها
الأعضاء المشاغبين ..
ممكن نجيب كام بولدوزر يساويها بالأرض ونبنى مكانها
( الاستحماية ) ..
بس المشكلة هنجهزها منين .. محتاجين تمويل يا بوس !!



المشرف :
ولا تمويل ولا حاجة ..
إحنا
نستلف كام دش على صابونتين على شوية شامبو
من الأعضاء لحد ما الزيارة تنتهى ..
وفيه أعضاء كتير نظاف هنا فى
المنتدى عندكم
الواد
الانتيخ .. ونٌصه .. وإخه ..
وإخه ده لوحده حكاية ..
ده
حتى فى ناس بيقولوا إنه إتعما من كتر الحما ..
وبيتعالج دلوقتى فى المستوصف
اللى جمبنا ..
و
بيحطولوه شامبو كل ساعتين فى عينيه ..


حلموس :
ما اتعماش ولا حاجة يابنى ..
أنا رحت زورته فى المستوصف إمبارح ..
دهوا كان بيشيل المية الزيادة
اللى على الشبكية فى عنيه ..


بالوظة :
يعنى إيه شبكية ياعمو؟!


يفتح المدير العام علبة دواء الضغط :
ويتناول حبة بعصبية ثم يقول ممكن نركز شوية ياجماعة


حزلقون :
أنا عندى فكرة جديده يا بوس ..


المدير العام :
قول يا سيدى ..!!



حزلقون :
فى اوروبا والدول المتقدمة ..
( الاستحماية ) فيها مكتبة !!
فممكن نجيب مجموعة كتب مش بطالة ..
فى الأدب والشعر وكتب طبية كمان ممكن أبعتها ..
ونعمل بيها مكتبة للى عايز يثقف وهو بيستحمة ..


المشرف :
هايل.. بس محتاجين كتب أطفال كمان ..


احمد نينجا :
ممكن
فتكات تساعدنا فى الموضوع ده ..
أنا هتصل بيها تبعت لنا
شوية كتب من عندها ..

( و هى اساسا قاعده معاه فى الاجتماع )


حلموس :
انا ما عنديش أى كتب غير ميكى و سوبرمان ..


بالوظة :
ليه ياجماعة منبعتش حد الجبل
يروح للمطاريد يستلف منهم شوية
كتب..
فيه منهم ناس كتير مثقفين وأكيد عندهم كتب محترمة
..



المشرف :
حد الله ما بينا وبينهم ..
تغور الكتب اللى تيجى من
ريحتهم..
قلبى وربى غضبانين عليهم إلى يوم القيامة
..



فتكات :
مين المطاريد دول ياعمو؟
!

المراقب :
ادخلى نامى إنتى علشان عندك مدرسة الصبح
..




فتكات :
طب تصبحوا على خير



احمد نينجا :
يعنى كويس كده لما تفتحوا عينين البت على الحاجات دى




بالوظة :
يظهر ان مفيش حد هيفهمنى هنا ..!!



المدير العام :
بيهرش فى دماغه وبيبوصله باشمئزاز
( وانا اللى كنت فاكرك غيرهم )

نيجي لأهم واخطر نقطة
لابد من
الإتفاق عليها ووضع أُطر وآلية تنفيذ لها ..
حيث إن مستقبل المنتدى كله يتوقف
عليها
..





المشرف :
خير قلقتني يا بوس




المدير العام :
أظن كلامي واضح يا سادة وماهوش رمادي ،
نقول كمان .. أنا أعني
يا أفاضل نقطة توزيع الادوار ..
بمعنى كل واحد مننا هايعمل إيه أثناء زيارة
اللجنة ..





حزلقون :
أنا فهمتك يا بوس ، بص يا سيدي ..
أنا طبعاً هالبس الحتة السموكن السودا اللي عندي
واللي ما بطلعهاش غير في المناسبات
وأضرب البيبيون
المفتخرة على شوية جل على شعري والنظارة الريبان السودا
وهابقى ولا
الخديوي شكوكو في زمانه ..
وإنت كمان تعمل زيي وتتصرف لك في أي حتة سموكن
ولك
مطلق الحرية تلبس بيبيون تلبس كرافتة او كوفية
مش مهم ..
وانا وإنت بس نبقى في
إنتظار سيادة اللجنة ..




المدير العام :
عظيم .. ممتاز إكسلنت ..
أنا كمان بأقترح
إن فتكات تشرف بنفسها على الأكل
عشان تتأكد إن كل حاجة ماشية حسب المعايير الطبية ..





حلموس :
إنتوا نسيتوا حاجة مهمة .. اللجنة لما تيجي تفتتح
المنتديات الجديدة بالتأكيد هاتطلب تلقي نظرة
على المنتديات المفتوحة
عندنا واللي ممكن تودينا في داهية
!!




المدير العام :
قصدك إيه ؟.. أفصح تكلم أيها الزميل الفاضح
قصدى الفاضل ..




حلموس :
أنا قصدي منتدى السياسة ..
وبذات الموضوع
اللى بيقول
( يا بخت من وفق راسين في الحلال
)





المشرف :
اتفق تماماً معاك يا حلموس
وعندك كمان
منتدى مكافحة الجراد..





احمد نينجا :
يعني بإختصار نخلي الحاجة الخفيفة واللي فيها فرفشة ..
أنا فهمتكوا





فتكات :
في كمان يا جماعة موضوع كلمة المنتدى
التي يجب أن يلقيها أحد
الزملاء بالنيابة عننا ..
أنا سيبولي الموضوع ده هاحضر كلمة محترمة
وأقولها قدام
اللجنة ..




المدير العام وهو بيجز على سنانة :
يا
فتكات لوسمحتى إستنى شوية .. كلمة إيه ؟
ده انتى قعدتك في كفر ابو عضمة نسيتك العربي
..
خليكى إنتى لزيارات السادة الرؤساء الأجانب ..
إبقى أتكلمى براحتك وما فيش حد
هايفهمك مننا او منهم




بالوظة :
يبقى ما فيش غير فتح الباب ..
نخليه يكتب كلمة مختصرة وبأقول تاني مختصرة
ويملاها شوية مصطلحات مكلكعة زي العودة لمائدة
المفاوضات
والحموم العادل والشامل ومزع جميع الأسلحة
من العرب ومنطقة الشرق الاوسط ..
والحاجات دي .. اكيد هيعجب اللجنة الكلام ده ..
وهتنشكح قوي لما تسمعه ..



حلموس :
على جثتي ..
فتح الباب لأ ..
الأخ ده
بقاله فترة له توجهات مش عجباني



المشرف :
وسع يا جدع إنت وهو ..
اما يا بوس فكرتلك في فكرة ..
اولاً هاستاهل عليها نص شهر
مكافأة ..
وثانياً اتحدى إن ماكنتش اللجنة تنفحنا فيها
قد 100ألف دولار علاوة ..




المدير العام :
قول انا في عرضك ..
أنا في حاجة ماسة
إلى أي ألية تدفع اللجنة
وتخليها ترضى عننا ..



المشرف :
انا طبعت المجلد بتاع " إسلامستان " وجلدته وزخرفته
وبقى عامل زي الملازم اللي كنا بنصورها أيام الجامعة
قبل الإمتحانات بيومين
..
فممكن بمنتهى البساطة أقوم مغير بس العنوان
من إسلامستان إلى " حمومستان
"


وانا عارف إن مستحيل اللجنة هاتقرأ الحشو اللي جوه
لأنها مش فاضية .. هما بس هايشوفوا
العنوان وهايزقططوا ..
إيه رأيك ؟



حزلقون :
أبوس تلافيف نخاشيش دماغك ..
إنت عبقري إنت فلته ..
روح يا شيخ انا عارف لو فيه منك 2 كنا عملنا ايه !!
( اكيد هيودونا فى داهيه )


المدير العام :
برافو يا مشرف .. جوووووووووود


المشرف :
تربيتك يا باشا وكل ده من خيرك


المدير العام :
هوه ده الكلام ..
أنا أبتديت
أُعجب بيكم
بعد ما عدلتم أفكاركم المسمومة بتاعت المحشي والملوخية
اللى كانت هتجيب لنا السحابة السودا فى المنتدى ..!!



المراقب :
قشطة يا رجالة ..
دى اللجنة كده عمرها ما هاتنسى الزيارة دى !!



المدير العام للمشرفين :
فضوها سيرة يالا .. وكفاية كده النهاردة ..
انا عندى ماتش كورة وموش فاضى !!





وانتهى الاجتماع على خير..





وحلقة اخرى ..




الحلقة السابعة



المدير العام :
هنبدأ الاجتماع النهاردة
وهنبتدى بدور الإعلام .. اللى هيقوم بيه الأخ عطعوط ..
واللى هاتبقى مهمته في غاية الخطورة والحساسية ..
إشرحله يا
حضرة المراقب ..


المراقب :
هاشرح لمين يا بوس ..
انا شايف
عطعوط فى ركن المطبخ من ساعة ..!!


وفجأة يخش عليهم عطعوط بسرعة ..


المدير العام :
كنت بتعمل ايه فى ركن المطبخ ياد ..!!


عطعوط :
كنت بفطر يا معلم ..!!


المدير العام :
معلم .. دى آخرتها ..!!
وطبعآ ضربتلك حلتين محشى ع الصبح
.. مانا عارفك طفس ..
عمومآ المراقب هايشرح لك دورك ايه ..


المراقب :
بص يا عطعوط .. إنت هاتكون مرافق للبعثة الإعلامية
المرافقة لرئيس اللجنة .. وركز قوي عليه وراضيه
على قد ما تقدر
.. وكل دورك هايبقى منحصر في إنك تمسك
كشاف وتقعد كل واحد في مكانه اللي هانتفق عليه ..



عطعوط :
يعني هاشتغل
Placer يعني؟



المدير العام
:
شاطر أديك فهمت اهوه .. يا ساتر !!


عطعوط :
حاضر ... خلص الكلام



المدير العام
:

يا نينجاوى ..



احمد نينجا :
أفندم ..



المدير العام :
إيه يا نينجاوى .. هو احنا في كانتين الجيش ..
أقعد يا
حبيبي ..
بص يا حبيبى إنت دورك هايكون مهم وحساس للغاية أيضاً ،
إنت عارف إننا
هانحبس بقيت الأعضاء الأفاضل في المنتدى
وراء حاجز زجاجي مضاد للرصاص ..
وكل دورهم
هايكون إنهم يتفرجوا علينا سواء وإحنا بنلف
على الأبواب أو وإحنا بناكل الاكل بتاع
مكسيم ..
يعني " متفرجون لا مشاركون " ..
علسان كده إنت هاتقف معاهم ورا الساتر ..
وهاتاخدلك
ساتر على جنب وكل دورك إنك هايبقى
معاك يافطتين
..



احمد نينجا :
أيوه عارف ..
يافطة مكتوب عليها للإيجار والتانية
تمليك



المدير العام
:

إيجار إيه يا عم
نينجاوى ؟ ..
إيه
شغل السماسرة ده ؟
يا سيدي يافطة هايبقى مكتوب عليها تصفيق ..
ترفعها لما أشاورلك
بإيدي اليمين ..
ويافطة مكتوب عليها هتاف ..
ودي ترفعها لما أشاورلك بإيدي
الشمال ..


فتكات
:
اما حلموس وحزلقون فهايمسكوا شوم ..
ويقفوا جنب
نينجاوى والعضو اللي مش هايتسجيب
أو يسقف زي ماحنا عايزين .. يدوله علطول ..



حلموس
:
نعم يا ختى ؟؟؟؟
بقى أنا مقطع نفسي
عشانكوا ..

وفي الاخر أقعد مع عامة الشعب .. طب والأكل ؟



المشرف :
يا ابنى هتاكل ما تخافش ..
انت كل همك على بطنك ..!!
هاعينلك علبتين
من بتوع مكسيم
تاخدهم معاك وإنت مروح ..



حلموس
:
لو حصلت
أي حركات كده ولا كده .. انا ممكن اخسركم ..
.. إلا الأكل ..
انا هاموت وأشوف الأكل
بتاع مكسيم ده عامل إزاي ..
ده مستقبلي ومستقبل عيالى ..!!



المدير العام
:
بالنسبة للأخت فتكات دورها طبعآ هاينحصر
في إنها تاخد الشباب
الصغير اللي هما جيل الطلائع
ويقفوا بره خالص وأول ما الريس ينزل من عربيته
يرفعوا
أعلام المنتدى الصغيرة ويروحوا قايلين النشيد الوطني
للمنتدى ..
غمض عينيك و امشي بخفة ودلع
الدنيا هي الشابة و انت الجدع

تشوف رشاقة خطوتك تعبدك

لكن انت لو بصيت
لرجليك ... تقع
وعجبي ..!!


المشرف :
انا بأقترح يا بوس نحفظهم برضوا كام طقطوقة
من الحاجات الوطنية اللي عندنا .. زي ..
حلوة يا بلحة ومقمعة ..
والميه تروى العطشان ..



المدير العام
:
بيبوصله بقرف .. اركن دلوقتى يا مشرف ..


المراقب
:
إنتوا نسيتوا نقطة مهمة يا
جماعة ..
السيدة الفاضلة مراة رئيس اللجنة ..
مين اللي هايستقبلها مننا
؟؟



المدير العام :
مممممممممم ..
فتكات طبعا بعد ما تخلص استقبال الريس
مع شوية العيال بتوعها ..
تروح ومعاها لفيف من بنات ومشرفات
المنتدى
كممثلين عن الجنس اللطيف هنا ..



احمد نينجا :
انا بأقترح يبقى معاها .. أطقوطة و ميرو و الشعنونة ..


المراقب
:
اوبتكشن ( إعتراض يعنى )..!!
أولاً
فتكات هاتصدع دماغ الست ..
وهتكلمها عن
حروق المرأة والظلم والاستضهاد
وطبعآ الست أكيد ما
بتحبش كده لأنى على ما سمعت انها
بتاعت مكتبات وتطعيم وكلام من ده
..


وبالنسبه ل
أطقوطة فمش هاتقدر تيجي في اليوم ده
لأنها قالتلى إن عندها تدريب عملي في جنينة
الحيوانات ..


والشعنونة بقى حكايتها حكاية ..
لانها عصبية شويتين .. وممكن تعملنا شوشرة ..
وافرضوا راحت متعصبة على رئيس اللجنة ..
مش بعيد تضربه برقبة قزازة أو تغزه بمطوة ..!!



المدير العام :
بس مفيش ادامنا غيرهم ..


المراقب
:
طيب انا هنزل معاهم الموسكي أشتريلهم كام فستان
على كام شراب فيليه و شنطة
و جزمة شكل بعض ..
عشان يبقى منظرهم حلو .. إيدك بقى يا بوس ..



المدير العام
:
ايدي إيه ؟؟ انت هاتقراللى الكف ..!!


المراقب
:
إيدك على 120 جوند عشان الحاجات دي ..
أحنا داخلين على ايام ما يعلمها الا ربنا .. بقى ..
والكلام ده وبستلف ثمن
أكلى ..



المدير العام
:
طب خلي فتكات وأطقوطة يدفعوا وهابقى احاسبهم ..
أو ياخدوا ببقية حسابهم مشاركات زيادة ؟..



بالوظة :
عايزينك بقى يا
فتكات إنتي والبنات تسلوا الست ..
وتبعدوا عن أي حاجة تزعلها .. وتخلي أطقوطة تقعد
تحكيلها شوية من مغامرتها في بلاد
الواء الواء وما وراء النهرين .. انا عارف الحريم بيحبوا الحكاوي دي قوي ،
الرغى بقى ،
وانا بأحذر الشعنونة إنها تتلامض او تتفلسف
قدام الست .. عايز الليلة تعدي على خير
وعايز روحكوا تبقى خفيفة ..



حزلقون :

يا جدعان هوانا وقعت من قعر القفة ..
دوري فين مانا مشرف برضوا ..
ولا أنا كمالة عدد وخايفين من الحسد ..
وجايبيني عشان بتتفألوا بي ؟



المدير العام :
مازلت أرجو ان تغير إسمك اللي بيسببلي حساسيه مفرطة
إنت حولك علامات إستفهام كتير ..
وسوف يتم مناقشتها بعدين ..
بس نخلص من الكابوس ده ..



المشرف :
خلاص كده موافقة ..
ربنا معاكوا يا ولاد وما تنسوش تستحموا كلكوا
يوم الزيارة وكل
واحد يروح على موضوع
" ما هي كولونيتك المفضلة "

ويختار له نوع من الحاجات اللي فيه على حسابي ..
ويرش براحته ..


وانتهى الاجتماع على خير..


أدوات الموضوع

الانتقال السريع

DamasGate Wiki